​ದುಬೈ/ ಕೊಡಗು: ಕರ್ನಾಟಕದ ಮಣ್ಣಿನ ಮಗನೊಬ್ಬ ಇದೀಗ ಅರಬ್ ರಾಷ್ಟ್ರದಲ್ಲಿ ನಭೂತೋ ನಭವಿಷ್ಯತಿ ಎಂಬಂತೆ ಇತಿಹಾಸ ಸೃಷ್ಟಿಸಿದ್ದಾರೆ. ಜೂನ್ 29, 2026 ರಂದು ಯುನೈಟೆಡ್ ಅರಬ್ ಎಮಿರೇಟ್ಸ್ (UAE) ದೇಶದ ಅತ್ಯಂತ ಬಹುನಿರೀಕ್ಷಿತ ಹಾಗೂ ಮಹತ್ವಾಕಾಂಕ್ಷೆಯ ‘ಎತಿಹಾದ್ ರೈಲು’ (Etihad Rail) ಸೇವೆಯ ಚೊಚ್ಚಲ ಪ್ರಯಾಣವನ್ನು ಯಶಸ್ವಿಯಾಗಿ ಮುನ್ನಡೆಸುವ ಮೂಲಕ ಕೊಡಗು ಜಿಲ್ಲೆಯ ಮಾದಾಪುರ ಮೂಲದ ರಿಯಾಜ್ ನಜೀರ್ ಅವರು ಇಡೀ ವಿಶ್ವವೇ ಕನ್ನಡಿಗರತ್ತ ತಿರುಗಿ ನೋಡುವಂತೆ ಮಾಡಿದ್ದಾರೆ.

​ಯುಎಇಯ ಈ ಐತಿಹಾಸಿಕ ರಾಷ್ಟ್ರೀಯ ಪ್ಯಾಸೆಂಜರ್ ರೈಲು ನೆಟ್‌ವರ್ಕ್‌ನ ಉದ್ಘಾಟನಾ ಓಟದ ಸಾರಥ್ಯ ವಹಿಸಲು ರಿಯಾಜ್ ನಜೀರ್ ಆಯ್ಕೆಯಾಗಿದ್ದು, ಇದು ಗಲ್ಫ್ ರಾಷ್ಟ್ರಗಳ ಸಾರ್ವಜನಿಕ ಸಾರಿಗೆ ವಲಯದಲ್ಲಿ ಕನ್ನಡಿಗನ ಮುಕುಟಕ್ಕೆ ಬಿದ್ದ ಮತ್ತೊಂದು ಬಂಗಾರದ ಗರಿಯಾಗಿದೆ.

ಸವಾಲುಗಳನ್ನೇ ಮೆಟ್ಟಿ ನಿಂತ ಉದ್ಘಾಟನೆಗಳ ಸರದಾರ..!
​ರಿಯಾಜ್ ಅವರಿಗೆ ಇಂತಹ ಪ್ರತಿಷ್ಠಿತ ಮತ್ತು ಜವಾಬ್ದಾರಿಯುತ ಕೆಲಸಗಳು ಹೊಸದೇನಲ್ಲ. ಗಲ್ಫ್ ದೇಶಗಳ ಹೈ-ಪ್ರೊಫೈಲ್ ಸಾರಿಗೆ ಯೋಜನೆಗಳನ್ನು ಉದ್ಘಾಟಿಸುವಲ್ಲಿ ರಿಯಾಜ್ ಅವರು ಈಗಾಗಲೇ ಜಾಗತಿಕ ಮಟ್ಟದಲ್ಲಿ ಹೆಸರು ಮಾಡಿದ್ದಾರೆ:
​ಕತಾರ್ ಮೆಟ್ರೋ (Qatar Metro) ಇದರ ಉದ್ಘಾಟನಾ ಕಾರ್ಯಾಚರಣೆಯಲ್ಲೂ ರಿಯಾಜ್ ಅವರೇ ಕ್ಯಾಪ್ಟನ್ ಆಗಿ ರೈಲು ಮುನ್ನಡೆಸಿದ್ದರು. ​ಕತಾರ್ ಟ್ರಾಮ್ (Qatar Tram) ಇದರ ಚೊಚ್ಚಲ ಪ್ರಯಾಣದ ಸಾರಥ್ಯವನ್ನೂ ಇವರೇ ವಹಿಸಿಕೊಂಡಿದ್ದರು.

​ಎತಿಹಾದ್ ರೈಲು (Etihad Rail) ಈಗ ಯುಎಇ ದೇಶದ ಹೆಮ್ಮೆಯ ಕನಸಿನ ರೈಲನ್ನು ಮೊದಲ ದಿನವೇ ಮುನ್ನಡೆಸಿ ಹ್ಯಾಟ್ರಿಕ್ ಸಾಧನೆ ಮಾಡಿದ್ದಾರೆ. ​ದೊಡ್ಡ ಮಟ್ಟದ ಸಾರಿಗೆ ಉದ್ಘಾಟನೆಗಳನ್ನು ಅತ್ಯಂತ ಯಶಸ್ವಿಯಾಗಿ ನಿಭಾಯಿಸಿದ ಅವರ ಅಪಾರ ಅನುಭವವೇ ಇಂದು ಎತಿಹಾದ್ ರೈಲಿನ ಚೊಚ್ಚಲ ಪ್ರಯಾಣದ ಸ್ಟೀರಿಂಗ್ ಹಿಡಿಯಲು ಪ್ರಮುಖ ಕಾರಣವಾಗಿದೆ.
​
ಸೈಕಲ್ ಕೊಳ್ಳಲಾಗದ ಸ್ಥಿತಿಯಿಂದ ಕೋಟಿ ಕೋಟಿ ಬೆಲೆಯ ಬುಲೆಟ್ ವೇಗದ ರೈಲಿನ ಸಾರಥಿಯವರೆಗೆ ರಿಯಾಜ್.
​ಈ ಐತಿಹಾಸಿಕ ಮತ್ತು ಯಶಸ್ವಿ ಕ್ಷಣದ ಬಗ್ಗೆ ರಿಯಾಜ್ ಅತ್ಯಂತ ಭಾವುಕರಾಗಿ ತಮ್ಮ ಬಾಲ್ಯದ ದಿನಗಳನ್ನು ನೆನಪಿಸಿಕೊಂಡಿದ್ದಾರೆ.
​ರಿಯಾಜ್ ನಜೀರ್ ಅವರ ಮಾತುಗಳಲ್ಲಿ “ನನ್ನ ಬಾಲ್ಯದಲ್ಲಿ, ನನ್ನ ತಂದೆ-ತಾಯಿಗೆ ನನಗೆ ಒಂದು ಸಣ್ಣ ಸೈಕಲ್ ಕೂಡ ಖರೀದಿಸಿಕೊಡಲು ಆರ್ಥಿಕವಾಗಿ ಸಾಧ್ಯವಿರಲಿಲ್ಲ. ಆದರೆ ಇಂದು, ಯುಎಇ ದೇಶದ ಹೆಮ್ಮೆಯ ರಾಷ್ಟ್ರೀಯ ರೈಲು ನೆಟ್‌ವರ್ಕ್‌ನ ಉದ್ಘಾಟನಾ ದಿನದಂದೇ ಇಡೀ ರೈಲನ್ನು ಮುನ್ನಡೆಸುವ ಜವಾಬ್ದಾರಿ ನನ್ನ ಹೆಗಲಿಗೇರಿರುವುದು ನನಗೆ ಅಪಾರ ಹೆಮ್ಮೆ ಮತ್ತು ತೃಪ್ತಿ ತಂದಿದೆ.”

​ಕೊಡಗಿನ ಹಳ್ಳಿಯಿಂದ ದುಬೈ ಮಹಾನಗರದವರೆಗೆ ಬೆಳೆದು ನಿಂತ ಕನ್ನಡಿಗನ ಈ ರೋಮಾಂಚಕ ಯಶೋಗಾಥೆ ಇಡೀ ಕರ್ನಾಟಕಕ್ಕೇ ಹೆಮ್ಮೆ ತಂದಿದೆ.

ನಮ್ಮ ವರದಿಗಾರರು

ಸ್ಟೀವನ್ ಕುಲಾಸೊ