1908 ನವೆಂಬರ್ 8 ತಾರಿಕೆರ್ ಬಾರ್ಕುರ್ ಫಿರ್ಗಜೆಚೊ ನವೊ ವಿಗಾರ್ ಜಾವ್ನ್ ಆಯಿಲ್ಲ್ಯಾ ಬಾಪ್ ಫ್ರಾನ್ಸಿಸ್ ಡಿಸೋಜಾ ಬಾಪಾಕ್ (ಹೊ ಬಾರ್ಕುರಾಕ್ ಆಯಿಲ್ಲೊ ಪಯಿಲ್ಲೊ ಮಂಗ್ಳುರಿ ಯಾಜಕ್) 1854 ಇಸ್ವೆಂತ್ ಪ್ರಸ್ತುತ್ ಜಾಗ್ಯಾರ್ ಬಾಂದ್‌ಲ್ಲೆಂ 60 ಫೂಟ್ ಲಾಂಬ್ ಆನಿ 20 ಪೂಟ್ ರೂಂದ್ ಆಸ್‌ಲ್ಲೆಂ, 54 ವರ್ಸಾಂಚೆಂ ಪರ್ನೆಂ ಕೊಪೆಲ್, ಫಿರ್ಗಜ್‌ಗಾರಾಂಚ್ಯಾ ಗರ್ಜಾಂಕ್ ಪಾವೊಂಕ್ ಅಸ್ಕತ್ ಜಾವ್ನಾಸ್ಚೆಂ ಧರ್‌ಧರ್ ಮ್ಹಣ್ ದಿಸೊನ್ ಯೆತಲೆಂ ದೆಕುನ್, ಹೆಂ ಕೊಪೆಲ್ ಮೊಡುನ್, ವ್ಹಡ್‌ಜಯ್ತ್ ಆನಿ ಸೊಭಿತ್ ಇಗರ್ಜ್ ಬಾಂದ್ಚೆಂ ಸ್ವಪಣ್ ಮತಿಂತ್ ಆಯ್ಲೆಂ. ಫಿರ್ಗಜ್‌ಗಾರಾಂಚಿಂ ಮನಾಂ ತಾಣೆಂ ವ್ಹಯ್ ಕರ್ನ್, ನವ್ಯಾ ಇಗರ್ಜೆಬಾಂದ್ಪಾ ಪಾಸತ್ ಪಯ್ಶೆ ಆನಿ ಸಾಮಾನ್ ಜಮಂವ್ಚೆಂ ಕಾಮ್‌ಯೀ ಆರಂಬ್ ಕೆಲ್ಲೆಂ. ಪೂಣ್ ತಿನ್‌ಚ್ ವರ್ಸಾಂನಿ ತಾಣೆಂ ತಾಚ್ಯಾ ದುಸ್ರ್ಯಾ ಮಿಸಾಂವಾಂ ಪಾಸತ್ ಫಿರ್ಗಜ್ ಸಾಂಡುನ್ ವೆಚೆಂ ಪಡ್ಲೆಂ. ನವ್ಯಾ ಇಗರ್ಜೆಬಾಂದ್ಪಾಚೆಂ ಸ್ವಪಣ್ ಉಪ್ರಾಂತ್ಲ್ಯಾ ವಿಗಾರ್ ವಿನ್ಸೆಂಟ್ ರೆಬೆಲ್ಲೊ ಬಾಪಾಂಚ್ಯಾ ಕಾಳಾರ್‌ಯೀ ಸ್ವಪಣ್‌ಚ್ ಜಾವ್ನ್ ಉರ್ಲೆಂ.

ಪೂಣ್ 1915 ಸಪ್ಟೆಂಬರ್ 11ವೆರ್‌ ವಿಗಾರ್ ಜಾವ್ನ್ ಆಯಿಲ್ಲ್ಯಾ ಬಾಪ್ ಡೆನಿಸ್ ಡಿಸೋಜಾ ಬಾಪಾಂಕ್ ಹೆಂ ಭಾಗ್ ಫಾವೊ‌ ಜಾಲೆಂ.

ಪರ್ನೆಂ ಆನಿ ಶಿಥಿಲ್ ಜಾಲ್ಲೆಂ 69 ವರ್ಸಾಂಚೆಂ ಕೊಪೆಲ್ ಮೊಡುನ್ ತಾಣಿಂ ಗೊಥಿಕ್ ಶೈಲೆಚೆಂ‌ ಪ್ರಸ್ತುತ್ ಆಸ್ಚೆಂ ಮಜ್ಭೂತ್ ಬಾಂದಪ್ ಬಾಂಧ‌ಯ್ಲೆಂ.

28 ಮೇ 1923 ವೆರ್ ತವಳ್ಚೊ ಭಿಸ್ಪ್‌ಸಾಯ್ಬ್ ಅಧಿಕ್ ಮಾನಾದಿಕ್ ದೊತೊರ್ ಪಾವ್ಲ್ ಪೆರಿನಿ (ಜೆ.ಸ.) ಹಾಣಿಂ ಹೆಂ ಬಾಂದಾಪ್ ಉಗ್ತಾವ್ನ್ ಆಶಿರ್ವದಿತ್ ಕೆಲ್ಲೆಂ.

ಆಜ್ ಆಮಿ ಪ್ರತ್ಯೇಕ್ ರಿತಿನ್ ದೆವಾದಿನ್ ಡೆನಿಸ್ ಸೋಜ್ ಬಾಪಾಂಚೊ‌ ಉಡಾಸ್ ಕಾಡ್ತಾಂವ್. ತಾಂಚ್ಯಾ ದೂರ್‌ದೃಶ್ಟೆನ್ ಆನಿ ಅವ್ವಲ್ ತಾಂತ್ರಿಕ್ ಶ್ಯಾಥೆಚ್ಯಾ ಮ್ಹಿನತೆನ್ ಹೆಂ ಇಗರ್ಜೆಬಾಂದಾಪ್ ಆಮ್ಕಾಂ ಫಾವೊ ಜಾಲಾಂ. ಹೆಂ ಬಾಂದಪ್ ಉಬೆಂ ಜಾಂವ್ಕ್ ಕಾರಣ್ ಜಾಲ್ಲ್ಯಾ, ರಗತ್ ಆನಿ ಘಾಮ್ ವ್ಹಾರವ್ನ್ ಭಾವಾಡ್ತಾನ್ ವಾವುರ್ಲೆಲ್ಯಾ ಆಮ್ಚ್ಯಾ ಮಾಲ್ಘಡ್ಯಾಂಚೊ ಉಡಾಸ್ ಕಾಡ್ಯಾಂ. ತಾಂಚ್ಯಾ ವಾವ್ರಾಚೊ ಫಳ್ ಆಮಿ ಜೊಡುನ್ ಆಸಾಂವ್ ಮ್ಹಳ್ಳೆಂ ಉಡಾಸಾಂತ್ ದವರ‌್ಯಾಂ. ಮರಣ್ ಪಾವ್‌ಲ್ಲ್ಯಾ ಫಿರ್ಗಜ್‌ಗಾರಾಂಚೊ ಮೊಗಾನ್ ಉಡಾಸ್ ಕಾಡ್ನ್ ತಾಂಕಾಂ ಸಾಸ್ಣಾಚೊ ವಿಶೆವ್ ಮಾಗ್ಯಾಂ.

ವೆಳಾಕಾಳಾಕ್ ಸಹಜ್ ಜಾವ್ನ್ ಇಗರ್ಜೆಬಾಂದಪ್ ವಿಸ್ತಾರಾಯಿಲ್ಲ್ಯಾ, ಎಕಾಪಾಟ್ಲ್ಯಾನ್ ಏಕ್, ಆಧುನಿಕ್ ಸವ್ಲತಾಯೊ ಮೆಳಶೆಂ ಕರುಂಕ್‌ ವಾವುರ್ಲೆಲ್ಯಾ, ಬಾಂದ್ಪಾ‌ನವಿಕರಣಾ ಪಾಟ್ಲ್ಯಾನ್ ಸೆವಾ ದಿಲ್ಲ್ಯಾ ಬಾರ್ಕುರ್ ಫಿರ್ಗಜೆಚ್ಯಾ ಸರ್ವ್ ವಿಗಾರಾಂಚೊ ಆಮಿ ಉಪ್ಕಾರ್ ಬಾವುಡ್ಯಾಂ.

ಆಮ್ಚೊ ಭಾವಾಡ್ತ್ ರಾಕೊನ್ ವ್ಹರ್ಚೆ ತಸಲೊ ಭೊಂವರ್ ಫಾವೊ ಕರ್ನ್ ಆಸ್ಚ್ಯಾ ಹ್ಯಾ ಇಗರ್ಜೆಬಾಂದ್ಪಾಕ್ ಮೋಗ್ ಪಾಟವ್ನ್ 103ವ್ಯಾ ವರ್ಸುಗೆದಿಸಾಚೆ ಉಲ್ಲಾಸ್ ಸಮೆಸ್ತ್ ಬಾರ್ಕುರ್‌ಗಾರಾಂಕ್ ಪಾಟಯ್ತಾಂವ್.

ದೆವಾಲಾಗಿಂ ಮಾಗೊನ್ ಪಾತ್ರೊನ್ ಸಾಂ.ಪೆದ್ರು ಆಮ್ಕಾಂ ರಾಕೊನ್ ವ್ಹರೊಂದಿ.

Eric Soans Barkur …..