ಮಂಗಳೂರು: ಪ್ರತಿಭಟನೆ ನಡೆಸಿದ್ದಕ್ಕೆ ಬಾಂಡ್ ಕೇಳಿದ್ದಾರೆಂಬ ಎಬಿವಿಪಿ ಮತ್ತು ಬಿಜೆಪಿ ನಾಯಕರ ಆರೋಪಕ್ಕೆ ಪೊಲೀಸ್ ಕಮಿಷನರ್ ಸುಧೀರ್ ರೆಡ್ಡಿ ಪ್ರತಿಕ್ರಿಯೆ ನೀಡಿದ್ದಾರೆ. ಪ್ರತಿಭಟನೆ ನಡೆಸಲು ಬಯಸುವ ಯಾರಿಗೂ ನಾವು ಎಂದಿಗೂ ಅನುಮತಿ ನಿರಾಕರಿಸಿಲ್ಲ. ಶಾಂತಿಭಂಗದ ಆತಂಕವಿರುವ ಸಂದರ್ಭಗಳಲ್ಲಿ ನಾವು ಕೆಲವು ಷರತ್ತುಗಳನ್ನು ವಿಧಿಸುತ್ತೇವೆ. ಇದನ್ನ ನಾವು ಹಲವು ಬಾರಿ ಮಾಡಿದ್ದೇವೆ ಎಂದು ಪೊಲೀಸ್ ಆಯುಕ್ತ ಸ್ಪಷ್ಟಪಡಿಸಿದ್ದಾರೆ.
ಈ ಬಗ್ಗೆ ಹೇಳಿಕೆ ಬಿಡುಗಡೆ ಮಾಡಿರುವ ಸುಧೀರ್ ರೆಡ್ಡಿ, ಆಗ್ನೆಸ್ ಕಾಲೇಜು ಬಳಿ ನಡೆದ ಪ್ರತಿಭಟನೆಗೆ ಸಂಬಂಧಿಸಿ ಅವರು ಯಾವುದೇ ಅನುಮತಿ ಕೋರಲಿಲ್ಲ ಅಥವಾ ಪೊಲೀಸರಿಗೆ ಪೂರ್ವ ಮಾಹಿತಿ (ಮುನ್ಸೂಚನೆ) ನೀಡಿರಲಿಲ್ಲ. ಕಾಲೇಜಿನ ವಿದ್ಯಾರ್ಥಿಗಳ ವಿರುದ್ಧ ಪೊಲೀಸರು ಯಾವುದೇ ಕಠಿಣ ಕ್ರಮ ಕೈಗೊಂಡಿಲ್ಲ. ಅವರಿಗೆ ಪ್ರತಿಭಟನೆ ನಡೆಸಲು ಅವಕಾಶ ಕಲ್ಪಿಸಿ, ಅಗತ್ಯ ಸಹಕಾರ ನೀಡಲಾಗಿತ್ತು.
ಆದರೆ ಹೊರಗಿನಿಂದ ಬಂದು ಒಳನುಗ್ಗಲು ಯತ್ನಿಸಿದವರ ವಿಚಾರದಲ್ಲಿ, ಕಾಲೇಜು ಆಡಳಿತ ಮಂಡಳಿ ದೂರು ನೀಡಿದರೆ ಅದು ಅತಿಕ್ರಮ ಪ್ರವೇಶವಾಗುವುದರಿಂದ ಅವರನ್ನು ಒಳ ಪ್ರವೇಶಿಸದಂತೆ ತಡೆಯಲಾಯಿತು ಎಂದು ಹೇಳಿದ್ದಾರೆ.
ಅವರನ್ನು ವಶಕ್ಕೆ ಪಡೆದ ಬಳಿಕ, ಮುಂದೆ ಇಂತಹ ಕೃತ್ಯವನ್ನು ಮರುಕಳಿಸುವುದಿಲ್ಲ ಎಂದು ಖಚಿತಪಡಿಸಿಕೊಳ್ಳಲು ಮುಚ್ಚಳಿಕೆ (ಬಾಂಡ್) ಬರೆಸಿಕೊಳ್ಳಲು ಬಯಸಲಾಗಿತ್ತು. ಆದರೆ ಅವರು ವಿದ್ಯಾರ್ಥಿಗಳಾಗಿರುವುದರಿಂದ ಅವರ ಮನವಿಗೆ ಸ್ಪಂದಿಸಿ, ಉದಾರ ದೃಷ್ಟಿಕೋನದಿಂದ ಅದನ್ನು ಪರಿಗಣಿಸಲಾಯಿತು ಎಂದು ತಿಳಿಸಿದ್ದಾರೆ.
ಇಷ್ಟೆಲ್ಲದರ ಹೊರತಾಗಿಯೂ, ಕಾಲೇಜು ಆಡಳಿತವು ಅವರ ಬೇಡಿಕೆಗಳನ್ನು ಒಪ್ಪಿಕೊಂಡಿದ್ದರೂ ಸಹ, ಅವರು ಮಧ್ಯಾಹ್ನ ಮತ್ತೆ ಸ್ಥಳಕ್ಕೆ ತೆರಳಿ ವಿದ್ಯಾರ್ಥಿಗಳನ್ನು ಪ್ರಚೋದಿಸಲು ಯತ್ನಿಸಿದರು. ಇದರಿಂದಾಗಿ ಅವರನ್ನು ಮತ್ತೊಮ್ಮೆ ವಶಕ್ಕೆ ಪಡೆದು ನಂತರ ಬಿಡುಗಡೆ ಮಾಡಲಾಯಿತು ಎಂದು ಹೇಳಿದ್ದಾರೆ.
Join Our WhatsApp Group!
Stay updated with the latest news and updates by joining our WhatsApp group. Click the button below to join:
Join Now
